Македонската етикета Филтер со своето дваесет и прво издание се зацврстува како стабилна издавачка сила на меѓународниот музички пазар. За разлика од претходните дваесет изданија на кои се појавуваа нови продуценти или музичари во подем, нашата најнова објава ја потпишуваат етаблирани музички ѕвезди со огромно искуство и богата кариера зад себе.

Kristian “Alpha” Townsend и Darren “Decoder” Beale се вбројуваат меѓу пионерите на електронската музичка сцена, а заслужни се и за дефинирањето на дел од тн. „бристолски“ звук. Покрај нивните соло кариери, музичката јавност ги познава и како членови на исклучително успешната група Kosheen, а во последниве неколку години актуелни се и со брејкбит проектот Ways And Means.

Akasha FX е нивниот најнов проект што претставува храбар исчекор во нов музички израз и е резултат на желбата да направат нешто сосема поинакво од она што го создавале досега. Ни претставува огромно задоволство првото издание на Akasha FX да биде објавено токму за Филтер.

Петте песни на ова EP по својот квалитет се задржуваат во рамките на модерната бристолска продукција, но притоа ги кршат сите правила на жанровите до кои се допираат. Заедничка особина на сите пет песни се разорните бас линии и несомнените влијанија од даб музиката. Но, многу е тешко да се опише длабочината на атмосферата што овие песни ја создаваат, затоа што тие функционираат на речиси потсвесно ниво.

Некои музички критичари веќе се обидуваат да го одредат жанрот на кој му припаѓа „Without Limits”. Дабстеп? Трип-Хоп? Лефтфилд? Не, не и никако не. Музиката на ова издание заслужува многу поголемо внимание од рутинско класифицирање во жанровски фиоки. Затоа ослободете го вашиот ум и слушнете ги Akasha FX. Веднаш ќе ви стане јасно за што зборуваме.

Akasha FX – Without Limits EP (FILTER021)

1. Without Limits
2. True Self
3. Stars feat. Frances Mary
4. Conscious feat. Jnr Blind
5. Without Limits (Akasha Breaks Fest Mix)

Without Limits EP на Akasha FX ќе се појави во продажба на 19 јули преку сите позначајни дигитални музички сервиси во светот.

Корисни линкови:

Akasha FX на myspace – http://www.myspace.com/akashafx

Филтер на myspace – http://www.myspace.com/filterlabel