Nicolas Jaar за опуштање ја слуша Gnossiennes nr. 3 од Erik Satie , а инспирација црпи од Slavoj Zizek

Nicolas Jaar, момчето кое во 2008 година, кога и официјално почна неговата кариера, ги заинтригира сите слушатели, продуценти, диџеи со неговата иновативност, свежина и емоции во својата продукција. Сосема случајно, слушајќи емисија на радио, која во тоа време ја водел Gadi Mizrahi (еден од сопствениците на Wolf+Lamb), се одлучува да ја испрати траката The Student, која што е супер прифатена од оваа издавачка куќа, за која и беше издадена заедно со ремикс на Seth Troxler.

Nicolas Jaar во моментов студира на Brown University во Провиденс, но тоа по се изгледа не му смета да го прави она што во моментов, очигледно му е најинтересно.

Повеќе прочитајте во интервјуто кое го направивме специјално за SkopjeClubbing…

Најпрвин, мило ни е што имаме можност да разговараме со еден од најиновативните продуценти во ова време, а првото прашање е, која беше твојата прва средба со електронската музика, можеби некоја трака или плоча која си ја слушал постојано?

Nicolas Jaar: Еден фотограф во Сантијаго ми го покажа Tiga DJ KICKS кога имав само 14 години. Отприлика во истото време го слушнав и Thé au Harem d’Archimède од Ricardo Villalobos. Но, јас сепак мислам дека отсекогаш сум сакал да ги контролирам сите аспекти на продукцијата и почувствував дека само со електронската музика можам тоа и да го достигнам.

Твоето прво издание беше на Wolf + Lamb, како те открија од оваа издавачка куќа или беше vice versa?

Nicolas Jaar: Јас всушност ги открив нив, во 2007 година, кога сеуште беа во минимал водите. Им ја испратив траката “The Student”, и од тогаш почнавме да работиме заедно.

Дали мислиш дека се појави во вистинското време, кога на луѓето веќе им здосади “сличниот” звук кој беше презентиран во изминатите четири години?

Nicolas Jaar: Јас мислам дека се што се случува, се случува во вистинското време.

Дали си свесен за својот успех, распространет си низ целиот свет. Во мојата земја на пример, луѓето ја обожаваат твојата музика, посебно девојките!?

Nicolas Jaar: Па, тоа е супер да се чуе. Всушност на никој од моите другари не му се допаѓа мојата музика, затоа и сум секогаш изненаден кога ќе слушнам дека им се свиѓа на луѓе од различни делови на светот.

Многу пати имаш настапувано во базата на Wolf+Lamb, Marcy Hotel во New York, зошто овој клуб и журки се толку специјални?

Nicolas Jaar: Подиумот е голем колку една спална соба, всушност тој и беше мојата спална соба ова лето. Тоа е едно приватно место. Ниту мириса на клуб, ниту изгледа така. Луѓето што доаѓаат на овие забави се добро информирани и доаѓаат со широко отворени срца. На пример, можам да пуштам многу спора музика, никој нема да ми вика : побрзо, похард…

Ти во моментов студираш, дали имаш време да се снајдеш во сето тоа, настапи во клубови, продуцирање?

Nicolas Jaar: Јас многу сакам кога правам музика и учам во исто време, се што ќе прочитам потоа прераснува во нешто. На пример, Жижек ме тера да правам музика со безобразни рап инструменти.

Исто така си и сопственик на издавачка куќа, кој се плановите, можеби некој специјален звук кој што ќе се издава?

Nicolas Jaar: Следното издание само што не излегло, ќе се појави на 5ти март. На ова издание ќе биде мојата трака Russian Dolls, со ремикс на Ryan Crosson. Плановите ми се овој лејбл да ја прошири визијата за музика, со тоа што ќе се претвори во нешто повеќе од електронска денс музика. Сакам да има, хип хоп, трип хоп, експериментална музика..Што и да функционира.

Сите се во исчекување на твојот нов албум, кој ќе се појави за етикетата Circus Company, што може да очекуваме, дали можеш да ни откриеш некои детали?

Nicolas Jaar: Очекувајте дека ќе излезе на есен. Ќе има неиздадена музика од моите live настапи. Но, сепак тоа ќе биде претежно нов материјал, и само можам да кажам дека тоа дефинитивно нема да биде музика за диџеи.

Дали има некој специјален звук, или музика која би сакал да ја вклучиш во својата продукција, а за тебе е интересно?

Nicolas Jaar: На мојот универзитет, изработувам инсталации, мали дрвени кутии кои имаат мини микрофон во внатрешноста. Различниот облик на дрвото ја менува и резонанцата на електронскиот звук внатре. Навистина сакам да го унапредам односот помеѓу органското и електрониката.

Кога си дома, во релаксирана атмосфера, каква музика слушаш?

Nicolas Jaar: CAN, Madlib, Bonga, Tinariwen, Goran Bregovic. Песната што е на највисокото место на мојот ITunes е Gnossiennes n.3 од Erik Satie. Нема да ви откријам колку пати е пуштена.

Благодарни сме на интервјуто,  се надеваме дека ќе слушаме уште за и од Nicolas Jaar, можеби со настап во нашата земја или во соседството.

Nicolas Jaar: Ви благодарам и јас, во Европа ќе имам турнеја ова лето. Со љубов, Нико.

Интервју: Катерина Милеска 2010